<html><body><div style="color:#000; background-color:#fff; font-family:HelveticaNeue-Light, Helvetica Neue Light, Helvetica Neue, Helvetica, Arial, Lucida Grande, без засечек;font-size:16px"><div id="yui_3_16_0_1_1442418005894_9875" class="">O kekadämans stimik!</div><div id="yui_3_16_0_1_1442418005894_9875" class="">Cedü ob, binos zesüdik ad bespikön säkädis anik, dilo valemikis e dilo patikis. </div><div id="yui_3_16_0_1_1442418005894_9875" class="">1. Bü brefüp hiel Oleg Temerov elonülom obe säkis tel tefü maf nüna. Balido, esäkom, vio mafotis nüna mutoy tradutön ini Volapük. In vödabuks fa Ralph e fa lautans votik epubon vöd “jölät” ad malön eli ‘byte’. Bai ced obik, el “jölät” binon vöd legudik, ab daloy-li gebön vödi at? Säk at davedükon säkädi telid, sevabo valemiki.</div><div id="yui_3_16_0_1_1442418005894_9875" class="">2. Vödabuks fa hiel Ralph: liman stimik kadäma obsik ä guvan soga bevünetik Volapüka < ninädons vödis ömik, kels ba no epubons in vödabuks ed in vödaliseds calöfik büo. Volapükans suvo no sevons, va dalons gebön vödis somik.</div><div id="yui_3_16_0_1_1442418005894_9875" class="">Cedü ob, Volapük töbo kanon-la jäfidön as kosädamedöm nen vöds mödik ut, kels epubons balidnaedo in vödabuks fa Ralph (ud in vödems fa otan). Vätälölo, das zesüdos ad vitön kofudi Volapükanas, kadäm okanon stetön patiko (as sam, dub slud dokümik), das vöds ut, kels epubons balidnaedo in vödabuks fa Ralph pro Linglänapükans e no labons vödis siämaröletiks tefü oks in vödaliseds büik calöfik, nendoto kanons pagebön in vödems Volapükik. Ye obinos zesüdik ad gudükumön pianiko vödabukis dabinik Linglänapükik (as sam, Ralph it plago suvikumo gebom vödi plu tikaviki “bevüresod”, ab vödabuks omik ninädons sotüli läs tikaviki “vüresod”, igo “Vüresod”).</div><div id="yui_3_16_0_1_1442418005894_9875" class="">3. Kludo cedob, das vöd “jölät” binon lönedik ä zesüdik. Bai ced obik, balugükumam traduta vödemas flagon, das defomamavöds sököl id opubons in vödalised seimik calöfik:</div><div id="yui_3_16_0_1_1442418005894_9875" class="">miljölät = kilobyte</div><div id="yui_3_16_0_1_1442418005894_9875" class="">balionjölät = megabyte</div><div id="yui_3_16_0_1_1442418005894_9875" class="">milbalionjölät = gigabyte</div><div id="yui_3_16_0_1_1442418005894_9875" class="">telionjölät = terabyte</div><div id="yui_3_16_0_1_1442418005894_9875" class="">miltelionjölät = petabyte</div><div id="yui_3_16_0_1_1442418005894_9875" class="">(foyümot nolavik ‘kilo-’ baiädon ko “mil”, el ‘mega’ baiädon ko “balion”, …)</div><div id="yui_3_16_0_1_1442418005894_9875" class="">4. Hiel Oleg id esäkom tefü brefods, kels sümedons-la brefodіs benosevädik nünömavik: KB, MB, …</div><div id="yui_3_16_0_1_1442418005894_9875" class="">Üf vöds, pö nümed kilid pemäniotöls, uvedonsöv calöfiks, tuvedots somik obinons mögik:</div><div id="yui_3_16_0_1_1442418005894_9875" class="">miljölät = mjölät = mj = mjt</div><div id="yui_3_16_0_1_1442418005894_9875" class="">balionjölät = bjölät = bj = bjt</div><div id="yui_3_16_0_1_1442418005894_9875" class="">milbalionjölät = mbjölät = mbj = mbjt</div><div id="yui_3_16_0_1_1442418005894_9875" class="">telionjölät = tjölät = tj = tjt</div><div id="yui_3_16_0_1_1442418005894_9875" class="">5. Pö penam e tradut vödemas brefik Volapüko eneodob vödis, kels sinifons (Linglänapüko) elis ‘traffic jam’, ‘roller skate’, ‘kick-scooter’, ‘racer’, ‘relay baton’, ‘unevennes’ (samo vega). No vilob gebön foginavödis tefik u notodotis tu komplitikis. Üf vöds sümik Volapükik no dabinons, mobob ad datuvön e zepön onis. Hiel Hermann: cifal obsik < emobom semanaedo subsati “tridavegöm” pro ‘kick-scooter’, e lecedob vödi at legudiki. Mobs obik:</div><div id="yui_3_16_0_1_1442418005894_9875" class="">‘traffic jam’ — toodakumam</div><div id="yui_3_16_0_1_1442418005894_9875" class="">‘roller skate’ — rolotasket</div><div id="yui_3_16_0_1_1442418005894_9875" class="">‘kick-scooter’ — tridavegöm (ya pemäniotöl)</div><div id="yui_3_16_0_1_1442418005894_9875" class="">‘racer’ — mätatoodistiran (e “mätatood” ad malön eli ‘bolide’; ba oneodoy i vödi ad nemön eli ‘race’, ‘rally’, samo “mätavabam”)</div><div id="yui_3_16_0_1_1442418005894_9875" class="">‘relay baton’ — mätarönastaf (e ba “stafamätarön” ad nemön eli ‘relay race’)</div><div id="yui_3_16_0_1_1442418005894_9875" class="">‘unevennes’ — neplenöfükot (sa värb “neplenöfükön” — vedükön bosi neplenöfiki)</div><div id="yui_3_16_0_1_1442418005894_9875" class="">6. Säk votik valemik davedon. Üf labobsöv vödi calöfik “rolotasket”, tän binosöv fasilik ad fomön vödi “rolotasketan”. Vöds sümik mutons-li pazepön calöfiko fa kadäm? U daloy-li lecedön vödis, de vöds calöfik medü yümots anik pedefomölis, as vöds vero calöfiks nen zep patik kadäma?</div><div id="yui_3_16_0_1_1442418005894_9875" class=""><br class=""></div><div id="yui_3_16_0_1_1442418005894_9875" class="">Kisi cedols-li?</div><div id="yui_3_16_0_1_1442418005894_9875" class=""><br class=""></div><div id="yui_3_16_0_1_1442418005894_9875" class="">Ko lestüm,</div><div id="yui_3_16_0_1_1442418005894_9875" class="">Daniel</div><div id="yui_3_16_0_1_1442418005894_9875" class=""><br class=""></div><div id="yui_3_16_0_1_1442418005894_9875" dir="ltr" class="">Pospenäd. Lüükob dokümi, vödemi löpik ninädöli.</div></div></body></html>