<html>
  <head>
    <meta content="text/html; charset=ISO-8859-1"
      http-equiv="Content-Type">
  </head>
  <body bgcolor="#FFFFFF" text="#000000">
    <div class="moz-cite-prefix">O Hermann digik!<br>
      <br>
          Danob oli ladöfiküno demü dins valik, kelis edunol jünu gönü
      Volapük.<br>
      <br>
           Äsä sagol, mens mödik u neföro elilons vödi "Volapük,"  u
      lecedons, das pük ya edeadon.    Ekö pöt gönik obes ad kleilükön
      dinis somik.<br>
      <br>
          Ladöfiküno nogna,<br>
      <br>
          Ralph.<br>
      <br>
          <br>
      <br>
      <br>
      <br>
      On 01/11/2012 11:21, Hermann Philipps wrote:<br>
    </div>
    <blockquote cite="mid:50925B20.7090307@onlinehome.de" type="cite">2012,
      novul, 01.
      <br>
      <br>
      O Kekadämans palestimöl!
      <br>
      <br>
      Ekö, dins e dinäds obik:
      <br>
      <br>
      (1a)
      <br>
      Ya sis vigs mödik bevobob tradutodi ela “Vödabuk Volapüka pro
      Deutänapükans“ fa Ralph. Vob at binon tidi-fegebik, bi mutob
      “güflekön stoni alik” ad kälön veräti tradutodas Linglänapükik
      demü vöds Deutänapükik.
      <br>
      Deutänapük ela Arie de Jong liedo semikna binon neklülik u
      misuemovik, kludo zesüdos ad lekuratiko vestigön sinifis pädesinöl
      ed ad tuvön tradutodis Linglänapükik, kels lönedons.
      <br>
      Jünu älemökob tonatis ‘n’ jü ‘p’, e nu bevobob tonati ‘m’. Vobod
      ad oflagon obe nog mulis tel u kil, bi vobods votik (i vobods tefü
      Volapük) ai dönu ropon töbidis at.
      <br>
      <br>
      (1b)
      <br>
      Ätradutob gaseda-lartügis anik tefü Volapük e Datuval ud ädunob
      naböfo-dönuamis tefik, sevabo: “Misuems no fovo” (lartüg dö
      deadamadel tumid ela Johann Martin Schleyer), “Natastunidot
      seledik” (lartüg dö mebaston in vilag di Fischbach), naböfo-dönuam
      lartüga dö ‘Hotel Restaurant Volapük’ tö Litzelstetten, e lartüg
      “In vino veritas – In vin binon verat” dö vin panemöl “Volapük”.
      <br>
      <br>
      (1c)
      <br>
      Ästütob eli Ralph demü tradutod konotas “Stadadunot” e “Züpädan”
      fa Frank Roger. Konot telid no nog blümon.
      <br>
      <br>
      (1d)
      <br>
      Pluna ämäniotob Volapüki pö grups difik ela ‘facebook’ ed id
      äpenob nunis anik tefü Volapük geböl Ido, Deutänapük e Volapük.
      Leigo Deutänapüko e Linglänapüko ägeob lartügis in gaseds
      bevüresodik tefü Volapük e Sperantapük diseinü verätükam küpetas
      pölik.
      <br>
      <br>
      (1e)
      <br>
      Äpenob dö mobs anik ela Kekadäman Arden tefü vöds nulädik.
      <br>
      --------
      <br>
      (2) Dü fütür stedöfik:
      <br>
      a. Ofövob bevobami tradutoda ela “Vödabuk Volapüka pro
      Deutänapükans“ fa Ralph.
      <br>
      b. Openob nunis Volapükik in grups ela facebook ed ela Yahoo.
      <br>
      c. Ofövob ad penön dö tikamagotis e mobis obik tefü vöds kaenik
      nulädik in Volapük.
      <br>
      d. Ofövob ad yufön eli Ralph demü tradutods konotas.
      <br>
      --------
      <br>
      (3)
      <br>
      a. Mobob, das Kadämans, mögiküno aldeliko penonsös a) pö
      Volapükagrup in facebook, b) pö Volapükagrup in Yahoo. Voto
      Volapük jenöfo jinos deadik lo publüg!
      <br>
      <br>
      b. Mobob, das meditobsös tefü desins, diseins e zeils voba
      Volapükik oba, bi dotob, das el “menefe bal, püki bal” nog lönedon
      as zeil veratik niteda obsik ün tim at. Atos no sinifon ad klemön
      spikedi at, ab ad givön lüodi vobe obik.
      <br>
      --------
      <br>
      (4)
      <br>
      Binos tikamagot legudik Cifala ad flagön obis, das nomädiko
      penobsös dö duns obsik demü pük obas. Spod bevü obs fibon, e
      davedükam tefik semik okanon yufön.
      <br>
      <br>
      Ko glids flenik,
      <br>
      Hermann
      <br>
      --------------------------------
      <br>
      <br>
      Am 29.09.2012 21:38, schrieb Brennus Legrae:
      <br>
      <blockquote type="cite">
        <br>
        KADÄM BEVÜNETIK VOLAPÜKA
        <br>
        <br>
        Tü del balid tobula, yela 2012.
        <br>
        <br>
        Kluo mobob, das tü del u tü vigadel seimik telidmula valik
        (binobs
        <br>
        valikans jäfädiks) openobs okis valik tefü (1) dunams obsik e
        (2)
        <br>
        odunams obsik e (3) mobs obsik e (4) tikamakots obsik in tim
        bevü
        <br>
        nuns, primöls tü del balid novula. Buükob penamaprogrami 'Word'
        (no
        <br>
        pos 2003). Kisi cedols-li?
        <br>
        <br>
        <br>
        Ko glids flenöfikün,
        <br>
        <br>
        Brian Bishop,
        <br>
        Cifal Soga Bevünetik Volapüka.
        <br>
        <br>
      </blockquote>
      <br>
      <fieldset class="mimeAttachmentHeader"></fieldset>
      <br>
      <pre wrap="">_______________________________________________
Kadam mailing list
<a class="moz-txt-link-abbreviated" href="mailto:Kadam@evertype.com">Kadam@evertype.com</a>
<a class="moz-txt-link-freetext" href="http://evertype.com/mailman/listinfo/kadam_evertype.com">http://evertype.com/mailman/listinfo/kadam_evertype.com</a>
</pre>
    </blockquote>
    <br>
    <br>
  </body>
</html>