[Kadam] Отв: Sérgio Meira, Danny Zhang

Igor Wasilewski espigor at gmail.com
Wed Mar 1 09:55:26 GMT 2017


O kadämans stimik!

Baicedob lölöfiko ko mobs at. Sevob, das el 'Danny Zhang' binom noe Volapükan jäfedik, kel nomädiko liegükom kulivi püka obsik, abi dalabom noli dibätik gramata e vödastoka. Süadob, das fuliko digädom cali at, e ko fred gretik ologob omi asä kadäman.

I vilob danön eli 'Sérgio Meira' demü vobod legretik oma gönü Volapük, pato in bevüresod. 
Memölo keblünotis veütik valik oma baicedob ko mob ad gevön ome stimatituli: stimakadäman.

Ko glids ladöfik
Igor Wasilewski, kadäman

> On Mar 1, 2017, at 17:24, Sérgio Meira <asehpe at gmail.com> wrote:
> 
> O cifal stimik e kadämans votik!
> 
> Fredob vemo, das Volapük laiglofön e das keblünots veütik nulik fa Volapükans legudik pelautöls nog pajafons! If laboböv timi saidik, nogna bejäfoböv dinis Volapükik, bi laikredob, das pük jönik hiela ,Schleyer' nedon paseivön e pabespikön fa mens valik.
> 
> Ab, liedö! atimo no kanob yufön, no kanob keblünön... Kanob te vipön oles benoseki e blesiri mödikis pö vob olsik gönü Volapük obas!
> 
> 
> Glidis ladöfik mödik sedom
> hiel ,Sérgio Meira'
> 
> 2017-02-28 14:09 GMT-03:00 Dan Morosof <shido2308 at yahoo.com>:
>> O stimiks cifal e kadämans votik!
>> 
>> Me atos vilob nunön, das baicedob ko mobs bofik pelofädöl. 
>> Cifal ya eplänom veitöfiko, das hiel ‘Danny Zhang’ esevädükom oki as Volapükan vemo skilik e nendoto digädom ad vedön liman kadäma Volapüka. El ‘Danny Zhang’ ya eduinom mödikosi gönü Volapük, zuo noe penom gudiko Volapüki gebölo, abi spikom mudöfo.
>> Leigüpo binos liedik, das hiel ‘Sérgio Meira’ no labom timi ad vobön gönü Volapük; vi! mödikos in lif mena sekidon de dinäds, no de vil ona. El ‘Sérgio Meira’ nendoto digädom stimatituli, bi ebenodistükom oki tefü Volapük e medü tradutods süperik, e medü digitükam vödemas mödik se el “Volapükagased pro Nedänapükans” pö jaf fonätadiläda ela ‘Wikipedia’. Nen vobods omik et samo ob no ekanoböv seivön mödikosi dö Volapük.
>> 
>> Ko lestüm e glids ladöfik,
>> Daniil Morozov,
>> vicifal
>> 
>> 
>> вторник, 28 февраля 2017 18:13 Hermann Philipps <hphilipps at onlinehome.de> писал(а):
>> 
>> 
>> 2017, febul, 28
>> 
>> O kadämans stimik!    
>> 
>> Me atos vilob jonodön oles Volapükani yunik Tsyinänik: ‚Zhang Yutong’, 
>> kel in Vesüdän gudikumo sevädom as ‚Danny Zhang’. Sis prim ela 2015 
>> ekevobom in Volapükagrups pö ‚Facebook’ e ‚Yahoo Groups’ me keblünots 
>> lemödik. Äfünom Volapükaklubi Tsyinänik: „Märalän“.
>> In gased obsik: Vög Volapüka < omiks vödems e poedots rigik e se 
>> tsyin, Yapäna- e Linglänapük petradutöls pänotükons, bevü ons: „Lid 
>> godalüla“, „Kat blövik“, „Dis celabims“, „Äl mel, visü florem“, 
>> „Drim“, „Richard Cory“, e ret. Enu enotükom pö ‚Facebook’ konoti: 
>> „Rojats“.
>> 
>> Zuo nu prodom Vödabuki lölöfik: Volapük-tsyin. Alan, kel föro 
>> esteifülon ad prodön u bevobön vödabuki Volapükik, sevon säkädis voba 
>> somik. Läbo el ‚Danny’ i suemon Deutänapüki, e kludo vestigom noe 
>> Volapükavödalisedis Linglänapükik, abi vödabuki Deutänapükik sa fövots 
>> fa el ‚Arie de Jong’.
>> 
>> Pö vestig vödabukas el ‚Danny’ ätuvom vemikis vödis nekleilik, e dub 
>> atos eyufom obes ad kleilükön vödis e vemo menodön vödabukis dabinöl.
>> 
>> Binom bal Volapükanas, kels nenzediko kompenons pö disputs e spods dö 
>> pük obsik, e nu bemaston süperiko Volapüki.
>> 
>> Demü nol, zil e meritabs oma gönü Volapük e kobovob nabätik fütürik ko 
>> om vicifal ed ob it cedobs, das el ‚Danny Zhang’ obinomöv liman mu 
>> völadik kadäma. ,Danny Zhang' it binom löliko blümik ad fölön bligis 
>> valik kadämana.
>> 
>> Ma bagaf: 5.2 num kadämanas binon jöl. Demü atos esäkob kadämani: 
>> ,Sérgio Meira’, va binomöv vilöfik ad gebidükön kadämanacali okik. Obs 
>> valik sevobs gudiko meritabis oma gönü Volapük in paset, sevabo 
>> Vükipedi, notükami Volapükagasedas in ‚Wikisource’, vödemis in gased: 
>> „Sirkülapenäd“, keblünotis mödik in Volapükagrup pö ‚Yahoo Groups’, e 
>> mödikosi votik.
>> El ‚Sérgio Meira’ ebaicedom, bi i atimo no labom timi saidik ad 
>> bejäfön dinis Volapükik. Egespikom: „Fredob vemo, das Volapük 
>> lailifon, e das binons Volapükans nulik, kels gebons e notükons püki 
>> jönik obsik zü vol valik.“
>> 
>> Vätälü lopikos mobob, das kadämanef:
>> 1ido, cälonös eli ‚Danny Zhang’ kadämani;
>> 2ido, gevonös ele ‚Sérgio Meira’ stimatituli: stimakadäman.
>> 
>> Begob oles, das ogespikolsös ünü dels jöl (2017, mäzul, 8).
>> 
>> Ko glids ladöfik,
>> Hermann Philipps, cifal
> 
-------------- next part --------------
An HTML attachment was scrubbed...
URL: <http://evertype.com/pipermail/kadam_evertype.com/attachments/20170301/ccab39c6/attachment.html>


More information about the Kadam mailing list