[Kadam] Dö vödalised aigloföl

Hermann Philipps hphilipps at onlinehome.de
Wed Sep 21 14:44:42 IST 2016


O kadämans stimik!

Ekö! nog setis anik tefü jafäd vödabukas:

--- > No dabinons vöds nezesüdik, te vöds ne plu pageböls. ---

Pos stud e bevob lunüpik vödabuka e fövotas fa el AdJ  sa vödemas in 
Volapükagaseds täxetob, das zao bal jü tel kildils vödas in vödabuk e 
pato in fövots ets neai pägebons plago in vödems. No "no plu", ab neföro.
Demü atos suvo fikulos at fümetön sinifis pedesinöl.

Tefü geb nünömas pö jafäd vödabukas de fonäts difik: Nünöms binons 
löliko stupiks.
Pas mutoyöv preparön kälöfiko fonätis at ön mod lönedik. Atos ye 
binonöv timiflagöl e fikulik demü kaliet no-jäfüdisevik fonäta-dokümas 
(äs sam: geb bundanik elas 'tab stops' e vagamalülas ('blank spaces') 
mödikas pla miedadits kleilik vü padüls in vödaliseds).

Kanoy dunön mödikosi, ab suvo atos no binon so fasilik, äsä ömans 
jinons cedön.

Ladöfiko,
Hermann

Popenäd: Kiöpo binons-li kadämans retik?
---------------------------

Am 20.09.2016 21:56, schrieb Brennus Volapükan:
> O Hermann stimik!
>
> Dabinons utans, kels logons väri lafo fuliki, ed utans, kels logons
> väri ot lafo vagiki.   Too ob logob nemödikosi in vär Volapüka --
> ab nemödikos kios!   No vina u drinoda vifik ud ela Coca-Cola;  ab
> konyaka ud ela whisky, ud ela schnapps ud ela grappa ud ela vodka
> [kikodo labobs vödi 'konyak' ab no votikis‽] -- drinoda nämik,
> nevifik, gütik.
>
> Du tim brefik, e dü galed olik, elogobs in resodapads obsik
> vödabukis e vödalisedis e gramatis plu ka ün degyels büik.   Igo in
> pened lätikün fa ol, esedol dokumi.   No kanoy u "daloy bedotön
> osi".
>
> Mob obik dö vödalised anapükik binon mögik, bi sökon vifi voba nuik
> e yufi nünöma:  ebaicedob ko Daniel, das vödabuk ela Ralph binonöv
> prim e stab pötik.   Too no sötobs fümükön süperi püka linglik,
> patiko du labobs vödabuki calöfik (to döfs nemödik) e bali in fomät
> leäktronik, bofikis püka deutik, ed (if Cherpillod vipom) püka
> Esperanto.   Küpetob, das no eletol vödis nedik in lised 'Fövots
> ... sa VpN'.   Ven polisedons vöds nulik in 'Vög Volapüka' fasiliko
> okanons paninükön ini lised stabik, kobiko ko saitatop, bi yumed at
> oyufon kleilükumön sinifi, e neai mögos tradutön vödi lölöfiko
> verätiko se pük bal ini pük votik.
>
> Äsä no sötobs datuvön nen zesüd vödis nulik, sötobs dakipön vödis
> valik Volapüka di e po Arie de Jong;  voto penäds vönikum, a.s.
> 'Volapükagased pro nedänapükans' no okanons pasuemön lölöfiko.
> Binobs tütans mükik püka at, e no kanobs votükön oni ini pük difik.
> No dabinons vöds nezesüdik, te vöds ne plu pageböls.
>
> Kodü atos e bi labobs ya lisedis in püks plu ka bal, e, do primo
> lütirobs slopanis nulik medü liseds fasilikum balpükik [liedo
> döfiks, do nedöf binon neflen guda], Volapük binon bevünetik.
>
> Dö vödalised Volapük-Volapük, eküpetob, das du ebespikobs miedetis
> e sinifis vödas, egebobs vödis Volapüka, kelis okanobs läükön a
> bal.   Fümiko binons nemödik -  ab lised at obinon din votik, no
> sunik.
>
> Battista Guarino (1434-1513) in vobot omik 'De ordine docendi et
> studendi' [Dö bit tidama e studama] (ISBN 0-674-00759-X), keli fädo
> ereidob edelo, saiton eli Plutarch (De educ. 13 (Mor.9F), pesaitöl
> fa Hesiod (Op. 361-362): "Parvula si tentes superadjecisse
> pusillis, Idque frequens peragas, grandis cumulatur acervum"
> [Smalikosis if estefüloy suiläükön me bosils, ed atosi suvo dunoy,
> masat gretik pokumon]
>
> Mobs oba non binons "jöniks" -- dabinons hogs, äsä esagob.   Gudiko
> äsevob, das lised de Volapükagased äninadon penamapökis;  ab nen
> pöks ettimik neai nu dabinonöv.   Too okanobs kanädükön steifülis
> obsik nuik ini fin frutik, plagik, flekik, ma spid nuik progedama.
> Vobatim pluik no poflagon.
>
> Ko glids ladöfik,
>
> Brian
>
>
>



More information about the Kadam mailing list