[Kadam] Sludam dö hiel Igor Wasilewski ad kadäman

Hermann Philipps hphilipps at onlinehome.de
Sat Oct 17 07:16:16 IST 2015


O kadämans stimik!

Hiel Igor Wasilewski ("Washirei") epenom vödemi sököl dö ok, dat 
sevolsös gudikumo, kim binom:

"Panemob Igor Wasilewski, binob Polänan, ab lödob sis yels mödik in 
Yapän. Suvo gebob i fomami yapänik nema obik, sevabo eli Washirei, ad 
pron yapänapükik pelönedüköli.
Pämotob ün yel: 1972 in Polän, zif: Krakow. Us ästudob sanavi, e pos 
daget diploma ävobob as sanan tö diläd lanivestigik malädanöpa 
niverik. Ye lefäk gretikün oba äbinon ai pükav, pato mekavapükav. 
Spikob pükis distöfik, sevabo Linglänapüki, Yapänapüki, Polänapüki, 
Volapüki, eli Esperanto ed Ido. Kanob spikön boso Deutänapüki, 
Rusänapüki e Latinapüki, i suemob mödadilo vödemis Fransänapüko, 
Litaliyäniko e Spanyänapüko pepenölis.
Ven äkömob lü Yapän, ävotükob vobi oba. Tidob Linglänapüki Yapänapüko. 
Kanob sagön, das fino dunob utosi, kelosi plidob. Äsä ämäniotob, lefäk 
cifik oba binon mekavapükav e pükav valemik, ab reton din nog bal, 
sevabo musig. Sperantapükans ba nolons obi danädü sirkotüls obik.

Lio äprimikon-li nited legretik oba dö Volapük? Balido ävedob 
Sperantapükan ün yel: 2000, ab jenöfo leigüpo ätüvob i Volapüki, ven 
äreidob dö jenotem Sperantapüka. Volapük ämagädon pö ob nämikumo ka 
Sperantapük. Älogob täno yegedi Volapükik fa hiel Hitoshi Kuriyama 
pipenöli. Sunädo äfümob das ävilob zilo lärnön Volapüki, ab säkäd 
äbinon, das no äsevob kiöpo tuvön bukis e vödabukis. Läbiko ätuvob in 
ladetabukil Sperantapükik ladeti Volapükana famik, hiela Jean Claude 
Caraco. Äpenob lü om, ed om ägepenom obe, leigüpo jonölo vegi lü hiel 
Ralph Midgley. Äbinos äsvo maifükam yana lü vol lejönik ä müsterik 
Volapüka. Ägetob de oms tidabuki balid, eli "Lehrbuch der Weltsprache 
Volapük" fa hiel Johann Schmidt, ed eli "Sirkülapenäd lü Volapükaflens 
Valöpo", keli nolobs as "Vög Volapüka". Somo ventür obik äprimikon. 
Äspodob ko Jean Claude e Ralph, äpenob i mödo lü Volapükagrup tö els 
Yahoogroups. Poso älabob paudi, kelosi pidob nutimo, ab egekömob dönu 
lü Volapükamuf leziliko. Vilob dunön mödikosi gönu mekavapük jönikün ä 
bo müsterikün at. Jäfed obik nutimik binon ledino mekam filmotas 
brefik Volapükik tö el Youtube. Cedob das no laboy fädis mödik ad 
lilön Volapüki paspiköl, kludo äsludob ad jafön sökodi filmotülas, 
keli änemob "Volapük paspiköl". Vilob blöfön, das Volapük binon pük 
noe papenöl, abi paspiköl."

Glidis,

Hermann Philipps,
cifal

---
Diese E-Mail wurde von Avast Antivirus-Software auf Viren geprüft.
https://www.avast.com/antivirus





More information about the Kadam mailing list