[Kadam] Büsids Kadäma S.B.V.-a

Brennus Legrae brennus at legranus.me.uk
Sat Sep 29 20:38:46 IST 2012


KADÄM BEVÜNETIK VOLAPÜKA

Tü del balid tobula, yela 2012.




O calasvists votik vel Kadäma e flens digik!

Deli gudik!   Noö!   Yeli gudik!   Niö!   Lölalifi läbik!  Benokömolsös! o 
nulikans, ini Kadäm Soga Bevünetik Volapüka!

Fino labobs Kadämi lölöfik kadämanas jöl ma statuds Soga Bevünetik Volapüka 
(http://xn--volapk-7ya.com/kadam/statuds.html).   E nu vobs nulik Kadäma ün 
yel votik primon.   Ab vobs kisotik-li?   Ad no te getön säkis, ab ad 
stigädon säkis, sevabo ad propagidön püki.

Bevü kläms, tuvob, das vöd obsik 'svist', keli löpo egebob in 'calasvist', 
säxänon de vöd deutik 'Schwester' = 'sör'.   Kiöpo klänedofs okis sörs 
obsik?

Ya Michael legudiko kälädom dinis bevüresodik.   Danö!   Vipol-li, begö!, 
nunön obis dö diseins fütürik ola in tef at?

O Hermann!   Gespikol suvo in bevüresod säkis dö pük.   Danö!   Ab obs valik 
gebobs püki saidiko gudiko ad konsälön okis in fel at.   Gudö!

Mobob pluo, das zesüdos mufe labön vödastoki gloföl, postimo fütüro 
Volapüko-Volapüko.   Ya labobs vödalisedi Volapüko-Linglapüko ela Ralph in 
bevüresod -- kö binos geböfikum ka pebüköl, bi kanoy sukön vödis igo 
linglapükik medü suköms.   Konlet kanon gretikön, if seiman obas ovipom 
kälön atosi e getön cedis e sludis Kadäma.   In mod ot, okanol konletön 
cedis e sludis Kadäma tefü dins gramata -- if votikan no ovipol kälön 
gramati.   Pluo obegols, das okoräkols pölis okik, patiko fa ob.

I cedü ob, sötos kleilükön deseinemi Soga, vidükön bagafi II-id statudas e 
mobön dinis nulik.

O kadämans, kelas nemis no epenob, välolös, if nu nosi dunols, begö, dunis 
lönedik e pötik!

Kluo mobob, das tü del u tü vigadel seimik telidmula valik (binobs valikans 
jäfädiks) openobs okis valik tefü (1) dunams obsik e (2) odunams obsik e (3) 
mobs obsik e (4) tikamakots obsik in tim bevü nuns, primöls tü del balid 
novula.   Buükob penamaprogrami 'Word' (no pos 2003).   Kisi cedols-li?

Sagoböv anu fino dö ob it, das no suemob gudiko gebi bevüresoda e nünöma, e 
das no vipob slopön resodi sogädik äs 'Facebook'.   Obs valik labobs bligis 
veütik mödik ad tufulükön libatimi obsik.   Patiko kredob, das no sötos, ni 
zesüdos, ni kanobs vobön vifiko tefü dins at veütik.   Kluo vobobsös kobiko 
nenspido, kälöfiko, ab fümiko.

Ko glids flenöfikün,

Brian Bishop,
Cifal Soga Bevünetik Volapüka.





More information about the Kadam mailing list