[Kadam] Kolköm Kadäma

Brennus Legrae brennus at legranus.me.uk
Sun Oct 28 16:22:35 GMT 2012


O Kadämans valik, ledigik!



Benokömolsös in kolköm spodik balid me bevüresod pevoköl tü d. balid novula. 
Spelob, das koboyuf obsik okodon, das Volapük ofulükon pladi pameritöl in 
vol.   Fredob vemiko, das ömikan obas ya epenom, ed ob mutob penön adelo bi 
olabob bligis in vig okömöl.



In pened büik ämobob, das kolkömaspod obsik ötefon dinis fol:  (1) dunotis 
lätik, (2) dunotis papromöl, (3) mobis pro fütür mufa, e (4) tikamagotis 
valemik.   Ekö obiks.



(1) (a)   Epenob lartügi in gased sperantapükik 'La ondo de Esperanto' ad 
kleilükön cedis (cedü ob) ela Schleyer visü Zamenhof e taiko.   Ämutoms 
jelodön püki, vobi lunik e slopanis okikis.   Bofans ätuükoms.   Patiko 
gramat e vödem Volapüka binons veratiko leodiks.   Äbinon lartüg pada gretik 
bal.



(1)(b)  Id äpenob penedi ta geb badik vöda sperantapükik 'Volapükajxo' in 
nüm posik gaseda at, bi binon pük, kel meriton dalestümi.



(1)(c)  Tü zädel pasetöl, in kolköm ela Orienta Federacio de Esperanto, kö 
valikans ikredoms, das Volapük lölöfiko ideadon, ekleilükob, das Volapük ai 
dabinon e das binos lemödikos in bevüresod dö on.



(2)  Dasinob oküpälön mögis koräkön misuemis tefü pük obsik.



(3)  Mobob, das i kekadämans sukoms mögis ad nünön püki obsik, ed das nunoms 
dunotis tefik.



(4)(a)  Sötos obes memön, das pük obsik no taon sperantapüki;  sötos no 
propagidön oni, te nunön tefü on.



(4)(b)  Spelob, das tikamagots ovedons mobs, e das mobs ovedons duns.



(4)(c)  Kisi cedols-li dö mod at ad busidön?



Spodakolköm ojenöl obsik okanon binön tü d. tü del balid yanula, if 
baicedols.   Opliton obi reidön dö edunots, adunots, odunots, mobs, tikods e 
nuns valasotik olsik.




Glidis valanes,



Brian.





More information about the Kadam mailing list