[Kadam] NEFLENS, NULÄLANS E LÖFANS

Ralph Midgley midgleyr at talktalk.net
Fri Oct 5 10:37:51 IST 2012


_FLENEFBEVÜNETIKVOLAPÜKA_

__

Tü del lulid tobula, yela 2012.

O Kadämans digik!

Mödikans elilons dö Volapük.Öimikans sevons, das Volapük binon jenöfo 
pük.Ömikans vilons lärnön oni.

Kiöpio kanons-li golön ad lärnön oni?Sukons tidodemisin Bevüresod.Ekö 
tidodemi dätü 1888.Benö!Ed ünü tim nelunik, elärnons Volapüki rigik nen 
sevön osi!

Ven tuvons Volapükaspadi in Bevüresod steifülons ad reidön vödemis 
alsotik us."Ab kisi elärnobs-li ebo anu?"säkons,"at no binon pük, keli 
elärnobs.Binon pük votik!"

Si!Ekö pük nulädik, kela sevons nosi, seko mutons lärnön i püki at.Pid 
kion, das emutons lärnön püki telna!

In Bevüresod dabinons noe tidodems Volapüka rigik ela Schleyer, abi 
tidodems Volapüka adelik, e no dasevons atosi!

Sekü atos, esludob, bü yels anik, ad dunön tidodemi Volapüka 
nulädik.Tidodem balid oba äbinon : "Volapük Vifik,"keli mödikans ägebons 
ad lärnön püki nulädik.Ab tidodem at äbinon nelunik, ed ömikans äflagons 
tidodemi lunikum obe.Sekü atos, eprimom, dü vaken famülik tö 
Scarborough-len-mel, tidodemi lunikum labü dils tel.Sosus edunoy 
tidodemi at, laboy noli legudik Volapüka adelik.Anu Kadäman Everson 
dabükom buki jönik tiädü :"Lärnobsös Volapüki"stabü tidodem at.Bukat 
obinon go frutik pro mens, kels no dalabons nünömi, ab kels vilons 
ilärnön Volapüki.Okanons remön oni latikumo dü yel.

Ab id edunob tidodemil votik, tiädü:"A Quick Look at Volapük". (= Loged 
Vifik).Sevob, das dabinons nulälans tefü Volapük.No vilons lärnön oni 
lölöfiko, ab nulälons dö gramat e stuk ota.Seko tidodemil at jonon 
gramati, e gebon vödastoki nemödik ad gebön samis püka.Sosus edureidoy 
oni, laboy noli saidik püka ad kotenükön nuläli dö pük.Sekü atos, nem 
gudik votik tidodemila at binonöv:"Tidodem Brefik pro Nulälans."Stunidob 
menis somik.

Ab, äsä sevols gudiko osi,dabinons neflens Volapüka, kels vilons komipön 
ta pük, e krütön oni.Ab lio kanons-li krütön püki nen sevön bosi dö pük 
it?Ekö tidodemil legudik pro ons.Nem gudik tidodemila at i 
binonöv:"Loged balid Volapüka pro Neflens ota."Pos stud vemo brefüpik 
kleilükama at, osevons säsantikosi ad gudikumo krütön oni.

Volapük sekidon de tidodems gudik ad tidön püki menes, kels vilons 
lärnön oni.Anu no mutons lärnön Volapüki rigik ad lärnön Volapüki 
nulädik, bi labons väli gudik tidodemas Volapüka pegeböl ün tim at.

Ad dünön gudiko Volapüki, komandolsös begö! tidodemis at neflenes e 
nulälanes, ab fümiko studanes, kels löfons tikamagoti Volapüka, e kels 
vilons sevön plu dö on.

Glidis Ladöfikün Valikanes

sedom

Ralph

-------------- next part --------------
An HTML attachment was scrubbed...
URL: <http://evertype.com/pipermail/kadam_evertype.com/attachments/20121005/da9a25c9/attachment-0002.html>


More information about the Kadam mailing list