[Kadam] PÖ LOGED BALID

Ralph Midgley midgleyr at talktalk.net
Thu Oct 4 11:00:24 IST 2012


_FLENEFBEVÜNETIKVOLAPÜKA_

Tü del folid tobula, yela 2012.

O Kadämans digik!

Spikobs suvo dö 'pük bevünetik.'Ab kis jenöfo binon sinif ota?Xamobsös 
vödi.'Bevü-netik' klülabiko sinifon 'bevü nets'ab nets kinik-li?Püks 
bevünetik adelik binons, samo, Sperantapük, ed eli 'Interlingua.'Ab 
binons-livero 'püks bevünetik'?

El 'Interlingua' lölöfiko no binon 'pük bevünetik' if viloy dubo 
pladulön pükis vola lölik.El 'Interlingua'pefünon stabü latin -- sekü 
atos, binon pükpötik ad gebön vü nets fa latin peflunöl.Jenöfo, binon 
pük gebovik 'bevü nets kuliva latinik".Slopans ela 
'Interlingua'pleidülons demü fasil sonemik püka, demü 'bevünetöf' 
püka.Sagons, das pük binon suemovik 'pö loged balid.'Fa pösods 
kinik-li?Fa lödans valik Frikopa-li?Fa lödans valik Siyopa-li?Igo fa 
lödans Yuropa-li?Dotob osi vemo.Sevädans mödik oba no kanons suemön eli 
'Interlingua' pö loged balid.Jenöfo el 'Interlingua' no binon pük 
bevünetik, sevabo:bevü nets vola, te bevü nets kuliva latinik.Sekü atos, 
onemob eli 'Interlingua' püki bevünetik (pemiedüköl).

Ekö sam gudik püka pemiedüköl.Sperantapük, votaflano, no gebon 
fraseodili: 'suemovik pö loged balid,'bi pöloy, ven geboy fraseodi 
somik.Ab binon-li Sperantapük bevünetik?No lölöfiko, do binon 
bevünetikum ka el 'Interlingua,'kel binon te suemovikbevü nets kuliva 
latinik, u fa mens no yuropiks, kels nitedälons dö kuliv at.Slopans 
Sperantapüka binons snatikums.Koefons, das mutoy studön püki ad gudiko 
gebön oni.Gidetons in tef at.Too Sperantapük no binon pük 'bevünetik' ma 
sinif kuratik vöda.Binon pük i pemiedüköl, bi tio vödem lölik binon 
latinik.Binon i pük gebovik bevü nets yuropik, e fa mens, kels 
nitedälons dö kuliv yuropik.

Ab tefüret vola-li?Pük 'bevünetik' fümiko no binon 'bevünetik' menes, 
kels no suemons vödi bal ota.Pük somik binon pük foginik ones.Sagons:"If 
vilobs lärnön püki foginik, (ad labön, samo, cali gudik kobü mesed gudik 
in läns vesüdik)kanobs lärnön buo Linglänapüki, u Fransänapüki, u 
Spanyänapüki pla sümäd mekavik otas."E gidetols.Cedü ons, püks 
'bevünetik' yuropik binons so foginiks ones äs netapüks.

E tefü Volapük-li?Ün yels balid püka at,lemödikans da vol lölik älärnons 
püki, bi jino, no äbinon pük te vesüdik, äbinon pük bevünetik.Buäd püka 
at no äbinon, das äkanoy suemön oni 'pö loged balid,'ab, das äbinon 
'nesuemovik pöloged balid'.Bi vöds mödikün äbinons se Vesüdän, no 
ädasevoy osi, bi pivotükons so skiliküno fa Schleyer it.In tef at, 
Vesüdäns no älabons buädi.EVesüdäns, e Lofüdäns, e Frikopäns, e lödans 
netas valik ämutonsleigo lärnön oni.Nek älabon buädi, Cedü alans, pük 
somik binon vero bevünetik!E Dokan de Jong sagom:"Pos steifs nensekik 
dütumyels mödik ad jafön kosädamedömi bevünetik . Volapük ga binon pük 
mekavik balid, kel ebluföfon ad binön plago gebovik pro kosäd bevünetik. 
e kel stadon lölöfiko neudiko tefü länapüks difik vola."Ekö plöp 
peklänedöl Volapüka pesävilupöl!

Igo nem "Volapük" sinifon "püki bevü nets vola".Seko binon pük bevünetik 
verik nepemiedüköl.

Glidis Ladöfikün sedom Oles

Ralph

-------------- next part --------------
An HTML attachment was scrubbed...
URL: <http://evertype.com/pipermail/kadam_evertype.com/attachments/20121004/de39055e/attachment-0002.html>


More information about the Kadam mailing list