[Kadam] VI-CIFALAM

Ralph Midgley midgleyr at talktalk.net
Mon Oct 1 15:24:37 IST 2012


_KADÄM  BEVÜNETIK  VOLAPÜKA_

Tü del balid tobiula, yela 2012.

O Kadämans digik!

     Jünu Vi-Cifal Soga Bevünetik Volapüka ebinom Kadäman Gasper.

     Ye bi tävom mödo, etuvom, das no labom timi saidik ad dedietön 
Vi-Cifalame.   Cifal ebespikom ko om fikulis in tef at bü nelunüp, e 
fino Kadäman Gasper esludom,  dälü Cifal, ad no  plu binön Vi-Cifal;   
kodü atos, Cifal elibükom omi de bligs valik oma Vi-Cifalama.   Too 
Kadäman Gasper vilom fövön limanami Kadäma, e Cifal efredom ad baicedön 
in tef at.

     Sekü atos, binobs anu nen Vi-Cifal, kel binon cal go veütik in 
Volapanef.   Ma statuds obas, Vi-Cifal binon pösod veütikün, bi preparon 
oki ad seimüpo plaädön Cifali, u nelaidüpiko, u laidüpiko, e muton sevön 
ad gudiko kevobön ko Cifal attimik.   Fino oyufon Cifali in valem.

     Äsä ya epenob osi, Vi-Cifal binon calan go veütik, bi seimüpo 
(spelabo!) pösod at obinon Cifal ad dugön, kuradükön, e nämükön 
Volapükanefi da vol.

     Seko obinos gudik, das Kadämans betikonsös dini fefik at.

     No glömolsös, begö! das:

1.    Volapükaflen alik kanon vedön Vi-Cifal.   (No muton binön Kadäman);

2.    Lisitan muton gudiko sevön Volapüki  (Klülabiko!);

3.    No kanoy nemön pösodi nen baiced pösoda tefik. (Sevabo:  pösod 
obinon vilöfik ad zepön cali somik, üf polofonöv one);

         Gudiko sevob, das no okanobs tuvön pösodi pötöfik 'ünü minuts 
lul,'  ab fümo kanobs sunädo betikön dini veütik at.

         Mobob, das betikoy dini dü mul bal (sev. jü del balid 
novula).   Tü tim et sedolsös obe begö! nemis lisitana(s).

         Ko Glids Ladöfikün.

_R. Midgley_         Sekretan : Kadäm Bevünetik Volapüka

-------------- next part --------------
An HTML attachment was scrubbed...
URL: <http://evertype.com/pipermail/kadam_evertype.com/attachments/20121001/dc56567b/attachment-0002.html>


More information about the Kadam mailing list